Engin áform eru uppi um að upprunalegir meðlimir Guns N"Roses snúi aftur í sveitina. Orðrómur hefur verið uppi um að gítarleikarinn Slash og bassaleikarinn Duff McKagan hyggi á endurkomu en hann er ekki á rökum reistur.
„Það eru engin áform uppi um endurkomu. Viðræður um slíkt hafa ekki heldur verið uppi," sagði umboðsmaður sveitarinnar. „Áður en fjölmiðlar birta fréttir af Guns N"Roses í framtíðinni er lágmark að þeir hafi staðreyndirnar á hreinu." Hann vildi heldur ekki staðfesta að Axl Rose og félagar færu í tónleikaferð á næsta ári til að fylgja plötunni Chinese Democracy eftir.
