Exista tapaði tæpum 13 milljörðum á þriðja fjórðungi

Exista tapaði 87,8 milljónum evra á þriðja ársfjórðungi. Á sama tíma í fyrra nam hagnaður félagsins 7,4 milljónum evra. Exista var stærsti hluthafi Kaupþings. Eign félagsins í bankanum gufaði upp nokkrum dögum síðar þegar ríkið tók hann yfir í kjölfar ríkisvæðingar Glitnis um mánaðamótin september-október.

Tap Existu í íslenskum krónum á fjórðungnum nam tæpum 12,8 milljörðum króna miðað við gengu krónu gagnvart evru í enda september.

Rekstrarhagnaður var á tímabilinu upp á 21,2 milljónir evra en var 107,5 milljónir árið á undan. Samdrátturinn nemur áttatíu prósentum.

Þá nam tapið á fyrstu níu mánuðum ársins 170 milljónum evra. Það jafngildir 24,7 milljörðum króna á gengi krónu gagnvart evru í lok september. Á sama tíma árið á undan nam hagnaðurinn hins vegar 869,5 milljónum evra.

Heildareignir Existu voru 6.276 milljónir evra í lok september og höfðu lækkað um 1.735 milljónir frá áramótum. Það jafngildir 21,6 prósenta lækkun. Heildarskuldir nám 4.289 milljónum evra og höfðu lækkað um 24 prósent frá áramótum.

Þá nam bókfært eigið fé 1.987 milljónum evra, sem er 381 milljón minna en í byrjun árs. Eiginfjárhlutfall var 35,9 prósent.

Í enda september hafði félagið tryggt lausafé til að mæta endurfjármögnun til næstu 51 viku og nægt lausafé til að standa við skuldbindingar til loka þriðja ársfjórðungs 2009.

Eins og áður sagði breyttist efnahagsreikningur Existu stórlega eftir þriðja ársfjórðung. Eftir að bresk fjármálayfirvöld tóku yfir rekstur dótturfélags Kaupþings í Bretlandi greip Fjármálaeftirlitið inn í rekstur bankans hér 9. október síðastliðinn. Það hafði veruleg áhrif á stöðu Existu, sem þá var stærsti hluthafi félagsins. Eign þess, sem var óveðsett, gufaði upp, og seldi félagið í kjölfarið eignir sínar í finnska fjármálafélaginu Sampo og Storebrand. Þá keyptu bræðurnir Ágúst og Lýður Guðmundssynir Bakkavör undan Existu í sama mánuði.

Stærstu eignir Existu nú eru Skípti, VÍS og Lýsing.

Exista samþykkti á sérstökum hluthafafundi í lok október að afskrá félagið og verður af því í næsta mánuði.

Uppgjör Existu