Sótti verðlaunin á Formúlu 1 bíl

Sebastian Vettel hjá Red Bull fékk ítölsku Bandini verðlaunin fyrir frábæra frammistöðu í Formúlu 1 á sunnudaginn. Hann ók Formúlu 1 bíl Torro Rosso frá keppnisliðinu í Faenza til ítalska þorpsins Brisghella til að sækja verðlaun sín.

Ferðalag Vettels um ítalskar götur og vegi var 12 km og í lögreglufylgd, en engu að síður var leiðin opinn almennri umferð.

Bandini verðlaunin er veitt til minningar um Lorenzo Bandini sem fórst í Mónakó kappakstrinum 1967. Bandini var frá Brisghella og meðal annarra ökumanna sem hafa fengið verðlaunin eru Felipe Massa, Mark Webber, Kimi Raikkönen, Michael Schumacher og Robert Kubica.

Vettel vann fyrsta sigur Torro Rosso í Monza kappakstrinum á Ítalíu í fyrra, en hann ekur nú hjá syssturliðinu Red Bull. Torro Rosso er ítölsk þýðing á Red Bull.

Vettel keppir í Istanbúl íi Tyrklandi um næstu helgi, en fjallað verður um ferðalag hans í þættinum Rásmarkið á Stöð 2 Sport á fimmtudagskvöld kl. 20.00.