Birkir Ívar: Ekki Kiel-vörnin fyrir framan mig

Markvörðurinn Birkir Ívar Guðmundsson átti hreint út sagt ótrúlegan leik í marki Hauka gegn Stjörnunni í kvöld. Hann varði 27 skot í leiknum en fékk aðeins á sig 16 mörk. Er óhætt að segja að frammistaða hans hafi gert gæfumuninn fyrir Hauka sem mörðu eins marks sigur.

„Ég var að finna mig vel og ekkert nema gott um það að segja. Það er því miður lítið gott um sóknarleikinn að segja. Vörnin var svo sem enginn draumur heldur. Þetta var ekkert Kiel-vörnin fyrir framan mig. Menn voru þó að berjast og leggja sig fram," sagði Birkir Ívar eftir leikinn.

„Ég held ég hafi aldrei verið í handboltaliði sem spilar svona illa en vinnur samt. Ég veit ekki hvort þetta var lélegasti leikur Hauka síðan ég kom heim en ég skal þó viðurkenna að hann var ekki mikið fyrir augað. Það er deginum ljósara."