Birgir Leifur enn á topp tíu

Birgir Leifur Hafþórsson er á einu höggi undir pari eftir fyrstu tíu holurnar á öðrum keppnisdegi á Opna Andalúsíu-mótinu sem fer fram í Sevilla á Spáni. Mótið er hluti af Evrópumótaröðinni í golfi.

Sem stendur er hann í 8.-15. sæti á samtals fjórum höggum undir pari.

Birgir Leifur hefur verið öllu stöðugri í sínum leik í dag en í gær og var á pari á fyrri níu. Hann fékk þá sjö pör, einn fugl og einn skolla. Hann byrjaði á 10. holu í morgun.

Hann fékk svo fugl á 1. holu og er því á einu höggi undir pari eftir tíu holur í morgun.

Birgir Leifur fékk aðeins eitt par á fyrri níu holunum í gær og verður því athyglisvert að sjá hvernig honum gengur á sömu holunum í dag.