Leikverkið Sexy Laundry er tilnefnt til þriggja verðlauna hjá tímaritinu LA Weekly en það þykja virtustu leikhúsverðlaunin í Englaborginni. Einn framleiðandi verksins er Íslendingurinn Óskar Eiríksson og hann var að vonum ákaflega glaður yfir þessum fréttum þegar Fréttablaðið náði tali af honum. „Þetta eru víst stærstu verðlaunin í borginni þótt þau telji lítið á ameríska vísu," segir Óskar og er þar að vísa meðal annars til Tony-verðlaunanna sem eru hálfgerð Óskarsverðlaun fyrir bandarískt leikhúsfólk. Í LA er þó urmullinn allur af leikhúsum og þar er mjög blómlegt leikhúslíf þótt allra augu beinist að sjálfsögðu að kvikmyndaframleiðslunni í Hollywood. Sexy Laundry er tilnefnt sem besti einleikurinn, besti leikstjóri einleiks og besta leikmyndin.
Óskar hefur lítið fengist við leikhúsframleiðslu á Íslandi, setti upp Hundrað prósent hittni með Helgu Brögu fyrir nokkrum árum og hafði veg og vanda af komu munka sem settu á svið mikið sjónarspil í Laugardalshöllinni. Undanfarin tíu ár hefur hann þó alfarið einbeitt sér að útlöndum og framleiðslu leikverka erlendis. „Maður kannski hálfskammast sín fyrir að segja þetta, en maður er bara í útrás. Kannski er það allt í lagi þegar maður í leikhúsbransanum," segir Óskar og hlær. Samstarfsaðilar Óskars í Sexy Laundry eru ekki af verri endanum; William Morris-umboðsskrifstofan og The Netherlanders, einn stærsti leikhúsframleiðandi Bandaríkjanna.
„Þeir eiga níu leikhús á Broadway og eru með leikhús um öll Bandaríkin," segir Óskar sem hefur mörg járn í eldinum, á meðal annars Evrópuréttinn að söngleiknum Menopause, söngleik um breytingaskeið kvenna, sem slegið hefur í gegn í Bandaríkjunum og Ástralíu. „Ég reikna með að setja hann upp í Bretlandi, Skandinavíu, Þýskalandi og á Spáni á næstu mánuðum og misserum," segir Óskar og útilokar ekki að verkið rati jafnvel alla leið til Íslands.
Hið sama á við um Sexy Laundry, Óskar vonar að það verði sett upp á Íslandi. Verkið fékk frábæra dóma í Varitey þegar það var frumsýnt en aðalleikarnir tveir eru þau Frances Fischer, sem lék meðal annars vondu mömmuna í Titanic og Paul Ben Victor, einn aðalleikaranna úr sjónvarpsþáttunum Entourage. -freyrgigja@frettabladid.is
