Valur úr leik í Meistaradeildinni eftir tap gegn Torres

Valur tapaði 1-2 gegn ítalska liðinu Torres í seinni leik liðanna í 32-liða úrslitum Meistaradeildar UEFA kvenna á Vodafonevellinum í dag en staðan í hálfleik var 0-1 fyrir gestina.

Katrín Jónsdóttir skoraði mark Vals í leiknum en Sandy Iannella og Patrizia Panico skoruðu mörk Torres. Torres vann fyrri leikinn 4-1 á Ítalíu og því einvígið samanlagt 6-2.

Jafnræði var með liðunum í leiknum en það skorti einhvern neista hjá Valsstúlkum til þess að gera einvígið einhvern tímann spennandi en það var svo sem vitað fyrirfram að á brattann yrði að sækja fyrir Val eftir tapið í fyrri leiknum.