Piquet mætti í yfirheyrslu hjá FIA

Nelson Piquet og Fernando Alonso eru báðir mættir í yfirheyrslu útaf svindlmáli sem tengist kappakstrinum í Singapúr í fyrra. Þeir voru kallaðir á fund FIA í París, þar sem málið er tekið fyrir í dag.

Búist er við harði refsingu vegna málsins, en yfirmenn Renault báðu Piquet að klessa á vegg svo Fernando Alonso næði forystu í mótinu. Piquet var boðinn friðhelgi ef hann greindi satt og rétt frá öllu sem gerðist í mótinu í fyrra.

Fjöldi fréttamanna er á staðnum, en Bernie Ecclestone bað menn að sýna stillingu og sagði að FIA yrði að dæma skynsamlega í málinu. Talið er að hætta sé á að Renault dragi sig út úr Formúlu 1, ef skellurinn verður harður. Það væri alvarlegt mál, þar sem bæði Honda og BMW hafa dregið sig út úr íþróttinni á síðustu tveimur árum.

Renault sér Red Bull fyrir vélum auk þess að vera með eigið lið. Þá er Willaims í viðræðum við Renault um vélar á næsta ári.

Keppt er í Singapúr um næstu helgi og málið hefur sett skugga á væntanlegt mótshald, en hér má sjá brautarlýsingu frá Síngapúr.