Breska stjórnin bjargar ekki Honda

Forráðamenn Formúlu 1 liðs Honda róa lífróður til að bjarga liðinu sem skipar 700 starfsmenn.Honda bílaverksmiðjan hefur gefið yfirmönnum liðsins tíma til 1. mars til að selja liðið, að öðrum kosti verði bækistöð liðsins í Bretlandi lokað.

Dagblaðið The Guardian hélt því fram í liðinni viku að breska ríkið væri að skoða að veita liðinu fé úr sérstökum sjóði, sem nefnist BERR. Liðið komi til greina þar sem velta þess sé yfir 25 miljónir punda á ári og að störf 700 manna séu í hættu.

Forráðamenn Honda viðurkenna að þeir hafi rætt við BERR í nokkur skipti, en það sé ekki tengt því að fá styrk eða greiðslu frá ríkissjóði Breta. Talsmenn sjóðsins segja hins vegar að Honda liðið geti vel sótt um styrk til sjóðsins. Hvert tilfelli sé skoðað af kostgæfni.

Trúlega vilja Honda menn draga úr umræðunni um slíkt til að valda ekki úlfúð á breska markaðnum sem berst í bökkum þessa dagana. Þá hefur liðði leitað fanga í löndum við Persaflóa, en þar er meira fjármagn en víða vegna olíuauðs.

Akstursíþróttir eru stór iðnaður í Bretlandi og yfir 50.000 manns vinna beinlínis í störfum sem tengjast akstursíþróttum. Flest Formúlu 1 lið eru með breskar bækistöðvar, en það eru McLaren, Red Bull, Renault, Force India og Williams.