Sutil sektaður um 1.1 miljón fyrir að keyra á þremur hjólum

Lewis Hamilton var allt annað en sáttur við þær breytingar sem hafa verið gerðar á Singapúr Formúlu 1 brautinni og telur einn stað í brautinni beinlínis hættulegan. Adrian Sutil tók flugið á þessum stað og brotnaði framfjöðrun á bílnum þegar hann lenti harkalega. Sutil fékk sekt eftir atvikið. "Brautin var erfið í dag, af því það voru blautir kaflar á sumum stöðum, en okkur gekk vel. Við erum samkeppnisfærir og ég er bjartsýnn. Ég held við getum keppt við gæjanna á undan okkur. Red Bull menn eru ekki ósigrandi hérna", sagði Hamilton í tilkynningu frá liðinu á f1.com. "Mér finnst breytingarnar á brautinni hafa gert hana verri og það er beygjukafli sem er mjög erfiður. Maður nálgast hann á þriðja hundrað km hraða og ef eitthvað klikkar og maður lendir á kanti, þá er möguleiki á slæmu óhappi", sagði Hamilton. Sutil fór einmitt flugferð sína á viðkomandi stað og var ekki eins ómyrkur í máli og Hamilton. "Ég gerði mistök í beygju og fór yfir kant. Bíllinn tók flugið og þegar hann lenti, þá brotnaði framfjörðun. Það voru vonbrigði því ég gat ekki prófað mýkri dekkin. Bíllinn er miklu betri en sá sem ég keppti hér á í fyrra og við getum náð góðum árangri um helgina", sagði Sutil. Sutil var sektaður um 10.000 dali fyrir að keyra bílinn eftir brautinni eftir óhappið á þremur hjólum og skapa þannig hættu fyrir aðra.