Jolie spennt fyrir framhaldi

Leikkonan Angelina Jolie segist spennt fyrir því að kanna persónu sína úr kvikmyndinni Salt betur.

Leikkonan, sem fer með hlutverk Evelyn Salt í spennutryllinum Salt, viðurkennir að hún hafi áhuga á að vinna að framhaldi myndarinnar því hún telji að það sé ýmislegt fleira sem hún eigi eftir að uppgötva í persónu sinni.

„Ég vil endilega gera framhald. Þú veist aldrei hvort þú færð tækifæri til þess, hvort aðdáendum kemur til með að líka það. Ég held það sé svo margt sem á eftir að skoða í lífi hennar, t.d. varðandi fjölskyldu hennar. Mig langar til að komast til botns í því hver hún í raun og veru er, Salt gæti í rauninni verið hver sem er," segir leikkonan.

Jolie hefur augljóslega heillast af fjölhæfni Salt og þráir greinilega mikið að leika hana aftur.

„Salt gæti verið í hvaða landi sem er, hún gæti talað hvaða tungumál sem er, þannig að tækifærin eru fyrir hendi. Fyrir mig sem leikkonu og manneskju sem finnst gaman að ferðast, þá væri frábært að fá að kanna heiminn með henni."