Umdeild plata poppkóngs

Ný plata frá poppkónginum sáluga Michael Jackson kemur út á næstunni. Hún hefur fengið misjafna dóma og vakið miklar deilur.

Nýjasta plata popparans sáluga Michaels Jackson, Michael, hefur fengið misjafnar viðtökur breskra gagnrýnenda. Platan kemur út um miðjan desember og þegar eru farnir að birtast um hana dómar.

Útvarpsmaður breska ríkisútvarpsins, BBC Radio One, hafði þetta að segja um plötuna:

„Það er ljóst að þetta er ekki ný plata með Michael Jackson heldur er þetta samansafn af áður óheyrðum lögum,“ sagði hann og fannst lítið til hennar koma. Gordon Smart hjá götublaðinu The Sun skrifaði:

„Í heildina er platan vonbrigði og kemst ekki nálægt bestu plötum hans, Off the Wall, Thriller og Bad.“ Blaðamaður The Independent bætti við að mörg laganna fjöruðu einfaldlega út án þess að enda almennilega, rétt eins og tónlistarmaðurinn sjálfur.

Á meðal gesta á plötunni eru Akon, 50 Cent, Lenny Kravitz og rokkarinn Dave Grohl sem spilar á trommur í laginu Monster. Miðað við þessa dóma virðist það ekki hafa dugað til. Aðeins eitt lag á plötunni var fullklárað af Jackson, ballaðan Much Too Soon sem var tekin upp á níunda áratugnum.

Hin tókst honum ekki að ljúka við áður en hann lést fyrir átján mánuðum.

Útgáfan hefur reyndar vakið miklar deilur. Margir telja að ekki hafi verið rétt að gefa út plötu með ókláruðum lögum, þar á meðal will.i.am úr hljómsveitinni The Black Eyed Peas sem taldi útgáfuna bera vott um vanvirðingu.

Akon er á annarri skoðun og telur að arfleifð Jacksons sé haldið á lofti með plötunni. Fjölskylda Jacksons hefur sömuleiðis kvartað yfir laginu Breaking News sem var sett í loftið fyrir skömmu og telur að Jackson hafi í raun ekki sungið það heldur sé um einhvers konar fölsun að ræða.

Útgáfurisinn Sony segist engu að síður sannfærður um að söngurinn hafi verið í höndum Jacksons, enda hafi það verið vísindalega sannað.

Hvað sem öllum dómum og deilum líður er ljóst að aðdáendur Jackson eiga eftir að kaupa plötuna í bílförmum, enda er hann fyrir löngu orðin goðsögn í þeirra augum.

freyr@frettabladid.is