Simmi: Hreindýralundir og jólaís

„Ég er giftur mesta jólabarni heims," svarar Sigmar Vilhjálmsson fjölmiðlamaður, kallaður Simmi, aðspurður út í jólaundirbúning á hans heimili.

„Bryndís er búin að vera að undirbúa jólin hægt og rólega frá því í október."

„Þannig að sjálfur jólaundirbúningurinn á sér langan aðdraganda."

„Þetta er mjög gott fyrirkomulag því við náum að klára allt í tæka tíð og getum því notið jólastemningarinnar í botn í desember."

„Konan mín á samt allan heiðurinn að undirbúningnum. Ég veiti hjálparhönd og elda jólamatinn," segir Simmi.

Hvað kemur þér í hátíðarskap? „Hátíðarskapið sjálft kemur alltaf á þorláksmessukvöld þegar maður er með skötubragðið í munnvikunum og jólatónlist í stofunni að skreyta jólatréð með strákunum."

„Síðan berum við pakkana undir tréð og prufukeyrum lýsinguna. En hægt og bítandi þá er hátíðarskapið að skríða uppá bakið á manni frá 15 desember. Jólabaksturinn, piparkökurnar og rjómakakóið er stór þáttur í því."

Eftirminnileg jól sem þú vilt deila með okkur? „Upplifun mín sem barn á jólum er ansi sterk og nær alltaf í gegn þegar maður hugsar til baka," svarar Simmi og segir:

„Ein jól eru sérstaklega eftirminnileg. Árið 1988, ég er ellefu ára og allir bræður mínir, fimm talsins, voru þá heima á Egilsstöðum með konum sínum og börnum. En þá voru fjórir þeirra giftir og ég föðurbróðir tíu barna," útskýrir Simmi og heldur áfram:

„Þá vorum við átján manns undir sama þaki. Það þurfti að taka hlé á pakkaopnun sem var síðan kláruð á jóladag."

„Við bræðurnir telfdum og spiluðum spil fram undir morgun samhliða því að hakka í okkur kökur og góðgæti. Þetta var eins og upphafsatriðið í Home Alone."

„Í seinni tíð, þá eru mjög minnistæð jólin 2002, en elsti sonur okkar Bryndísar fæddist 18. desember það ár. Þau jól voru svo friðsæl og „bleik"."

„Við vorum búin að öllu 1. desember og nutum þess bara að vera með Einari Karli og í matarboðum sem við komum ekkert nálægt."

„Það var allt einhvernveginn svo yfirvegað og friðsælt," segir Simmi.

Hvernig verður aðfangadagskvöldið hjá ykkur í ár? „Við verðum í fyrsta sinn bara fjölskyldan," svarar hann og segir:

„Enda erum við orðin sex manns. Einar Karl er orðinn 7 ára, þannig að hann mun stýra lestrinum á pökkum í fyrsta sinn og ég held að þetta verði alveg frábært hjá okkur."

„Hreindýralundir, jólasúpa og jólaísinn hennar Bryndísar verður á boðstólnum."

„Skák og spil verða ekki langt undan og síðan munum við öll leggjast upp í rúm með bók og smákökuskál og lesa okkur í svefn," segir Simmi áður en kvatt er með jólakveðju.-elly@365.is