Laus ró hefti framför Schumachers

Michael Schumacher reið ekki feitum hesti frá Formúlu 1 mótinu í Malasíu á sunnudaginn. Hann féll úr leik eftir að ró á afturdekki losnaði og er aðeins með 9 stig í stigamótinu, á meðan Felipe Massa sem er fremstur er með 39 og þéttur hópur manna með yfir 30 stig.

Stigagjöfin hefur reyndar breyst mikið, þannig að góður árangur skilar vænum stigum. Fyrir sigur fást 25 stig, annað sætið 18 og þriðja 15 og svo færri stig eftir því sem neðar dregur. Það er því dýrkeypt að falla úr leik, en að sama skapi eru menn fljótir að vinna sig upp listann ef vel gengur.

"Það var synd að ég gat ekki lokið mótinu. Ég hélt fyrst að fjöðrunin hefði bilað að aftan, en ró á vinstra afturdekkinu týndist. Bíllinn var hálf stjórnlaus í sjöttu beygju og ég gat varla stýrt honum og hann dreif ekki áfram", sagði Schumacher.

"Þetta var óvenjulegt og gerðist aldrei á æfingum og þetta er eitthvað sem þarf að skoðast. Ég vildi ljúka mótinu og tel ég hefði getað gert vel. En svona er kappakstur og ekkert hægt að æsa sig yfir þessu. Ég er ánægður fyrir hönd Nico, sem komst á verðlaunapall og það var gott fyrir liðið", sagði Schumacher.