Kylfusveinn á Masters í 50 ár

Masters-mótið um helgina verður afar sérstakt fyrir Carl Jackson, kylfusvein Ben Crenshaw. Mótið um helgina verður það fimmtugasta í röðinni hjá þessum aldna heiðursmanni.

Sagt er að hann sé jafn nauðsynlegur fylgihluti mótsins og græni jakkinn og Magnolia Lane.

Þegar Crenshaw byrjaði að vinna sem kylfusveinn á Masters voru allir leikmennirnir hvítir og þeir urðu að nota svarta kylfusveina sem voru í vinnu fyrir golfklúbbinn.

Kylfusveinarnir urðu þess utan að klæðast hvítum heilgöllum og er enn haldið í þá hefð. Hún er reyndar umdeild enda er afar heitt þegar mótið fer fram og heilgallarnir gera kylfusveinunum erfitt fyrir í hitanum. Þykir mörgum sem tengingin í þrælatímabilið sé enn of sterk í Augusta.

Öll sú umræða truflar þó ekki Jackson sem á ekkert nema góðar minningar frá Masters.

"Ég hugsa oft til baka og á mjög margar góðar minningar frá þessu móti," sagði Jackson sem var aðeins 14 ára er hann bar kylfurnar fyrir Billy Burke árið 1961. Síðan þá hefur hann aðeins misst af einu Masters-móti.

"50 ár er heil lífstíð. Það hefur verið mikð um blóð, svita og tár á þessum 50 árum," sagði Ben Crenshaw en Jackson hefur borið kylfurnar hans síðan 1976. Þetta verður í 35. skipti sem þeir fara saman á Masters.