Masters: Tiger var svekktur að hafa ekki nýtt tækifærið

Tiger Woods sýndi á lokakeppnisdeginum á Mastersmótinu í gær að hann er á réttri leið eftir erfiða 17 mánuði á atvinnumótaröðinni. Woods blandaði sér í baráttuna um sigurinn með því að leika á 67 höggum eða 5 höggum undir pari en bandaríski kylfingurinn var ósáttur við að hafa ekki nýtt tækifærið betur á síðari 9 holunum sem hann lék á pari eftir að hafa leikið fyrri 9 holurnar á 31 höggi.

Woods, sem hefur sigrað fjórum sinnum á Masters, hóf lokadaginn sjö höggum á eftir Rory McIlroy frá Norður-Írlandi, sem var efstur á -12. Woods var í miklum ham á fyrri 9 holunum og aðeins einu höggi frá því að jafna mótsmetið sem er 30 högg. Það má segja að Woods hafi gert út um möguleika sína á 15. Flöt þar sem hann var í góðu færi til þess að fá örn (-2) en boltinn fór rétt framhjá holunni.

Að lokum þurfti Woods að sætta sig við að enda fjórum höggum á eftir Charl Schwartzel frá Suður-Afríku sem sigraði á -14. Woods sagði eftir hringinn að hann hafi alls ekki nýtt þau færi sem hann kom sér í – pútterinn var ekki „heitur" og það dugir skammt í slíkri keppni.

„Ég átti að leika síðari 9 holurnar á 3-4 undir pari, ég kom mér í færin en ég nýtti þau ekki. Fyrri 9 holurnar voru góðar en síðari 9 holurnar ekki. Þar átti ég að gera betur," sagði Woods en hann hefur ekki sigrað á atvinnumóti í 18 mánuði.