Vettel fljótastur í tímatökum sem töfðust vegna óhapps

Sebastian Vettel hjá Red Bull náði besta tíma í tímatökum á Mónakó kappakstursbrautinni í dag. Tímatakan tafðist mikið vegna óhapps sem henti Sergio Perez hjá Sauber í lok tímatökunnar. Perez skall harkalega á varnarvegg og stöðvaðist tímatakan í langan tíma af þeim sökum á meðan hugað var að Perez.

Perez var fluttur í læknamiðstöðina á staðnum. Hann var með meðvitund og ræddi málin eftir atvikið samkvæmt ummælum frá talsmanni Sauber i frétt á autosport.com. Ef Perez fær leyfi til að keppa á morgun eftir óhappið í dag, þá verður hann tíundi á ráslínu.

"Maður situr í bílnum og biður um upplýsingar og það er erfitt að halda einbeitingu við svona aðstæður og líðanin er ekki 100% þegar maður veit ekki stöðuna. En skilaboðin eru þau að hann (Perez) sé í lagi, með meðvitund og að ræða málin og það er mikill léttir", sagði Vettel m.a. um gang mála í tímatökunni í dag og óhappið hjá Perez.

Áður en að óhappi Perez kom hafði Sebastian Vettel náð besta tíma í brautinni, en þegar tímatakan var ræst á ný eftir atvikið, þá náði enginn að slá út besta tíma Vettel. Vettel hefur náð besta tíma í tímatökum í tuttugu mótum á ferlinum, en hann varð í öðru sæti í keppninni í Mónakó í fyrra á eftir liðsfélaga sínum Mark Webber.



Tímarnir í dag

 1.  Sebastian Vettel      Red Bull-Renault     1m13.556s  

 2.  Jenson Button         McLaren-Mercedes     1m13.997s  + 0.441

 3.  Mark Webber           Red Bull-Renault     1m14.019s  + 0.463

 4.  Fernando Alonso       Ferrari              1m14.483s  + 0.927

 5.  Michael Schumacher    Mercedes             1m14.682s  + 1.126

 6.  Felipe Massa          Ferrari              1m14.877s  + 1.321

 7.  Lewis Hamilton        McLaren-Mercedes     1m15.280s  + 1.724

 8.  Nico Rosberg          Mercedes             1m15.766s  + 2.210

 9.  Pastor Maldonado      Williams-Cosworth    1m16.528s  + 2.972

10.  Sergio Perez          Sauber-Ferrari       engin tími

11.  Vitaly Petrov         Renault              1m15.815s   + 1.540

12.  Rubens Barrichello    Williams-Cosworth    1m15.826s   + 1.551

13.  Kamui Kobayashi       Sauber-Ferrari       1m15.973s   + 1.698

14.  Paul di Resta         Force India-Mercedes 1m16.118s   + 1.843

15.  Adrian Sutil          Force India-Mercedes 1m16.121s   + 1.846

16.  Nick Heidfeld         Renault              1m16.214s   + 1.939

17.  Sebastien Buemi       Toro Rosso-Ferrari   1m16.300s   + 2.025

18.  Heikki Kovalainen     Lotus-Renault        1m17.343s   + 2.136

19.  Jarno Trulli          Lotus-Renault        1m17.381s   + 2.174

20.  Jaime Alguersuari     Toro Rosso-Ferrari   1m17.820s   + 2.613

21.  Timo Glock            Virgin-Cosworth      1m17.914s   + 2.707

22.  Jerome D'Ambrosio     Virgin-Cosworth      1m18.736s   + 3.529

23.  Tonio Liuzzi          HRT-Cosworth         engin tími

24.  Narain Karthikeyan    HRT-Cosworth         engin tími