Laxinn mættur í Langá og Grímsá

Samkvæmt okkar heimildum sáust laxar við Laxfoss í Grímsá í gær og einhverjir á veiðistöðunum fyrir neðan. Við hjá Veiðivísi vorum á ferðinni norður á föstudaginn og kíktum í Skugga í Langá svona bara í leiðinni og það fór ekki á milli mála að það lágu tveir laxar í Strengjunum. Þetta eru góðar fréttir því það styttist í opnun í Grímsá. Hún opnar 22. júní og það verður spennandi að sjá hvernig hún opnar þetta árið því í fyrra gekk mjög vel frá fyrsta degi.

 

Langá opnar degi fyrr en Grímsá og það er líka mikil spenna meðan unnenda Langár að sjá hvernig hún opnar. Áin hefur verið þekkt í áratugi sem síðsumarsá en síðastu tvö ár hefur hún verið góð frá fyrsta degi og til lokunar. Eins og við höfum greint frá hér á Veiðivísi er vatnsstaðan í Langá frábær og nægt vatn til að miðla langt inní ágúst ef það kemur til þurrka eins og síðustu tvö ár.

Miðað við hvað mikið af laxi hefur gengið í ánna má reikna með, og við hjá Veiðivísi eiginlega fullyrðum, að ef aðstæður í ánni verða góðar hvað vatnsmagn varðar og ef göngur verða jafnkraftmiklar og síðustu ár, gæti Langá farið ansi nálægt ef ekki yfir 3000 laxa! Það sem hefur hamlað þessu síðustu ár er ekkert annað an vatnsleysi.