Button telur sigur skerpa einbeitingu og sannfæringu liðsmanna McLaren

Jenson Button hjá McLaren vann síðustu Formúlu 1 keppni sem var í Kanada og segist hafa fengið frí vikuna eftir mótið sem hafi gefið honum tækifæri að rifja upp jákvæðar minningar frá brjálaðri helgi eins og hann orðaði það í fréttatilkynningu frá McLaren fyrir næstu keppni.

Næsta keppni verður á götubrautinni í Valencia á Spáni um helgina og þar mætir Button með liðsfélaga sínum Lewis Hamilton og félögum hjá McLaren.

„Ég get ekki sagt það að sigra í Montreal hafi fært mér meiri hvatningu, því að ég var þegar skuldbundinn því að leggja mig allan fram. Hann þetta mun skerpa á einbeitingu og sannfæringu allra í liðinu. Við höfum sannað að við getum sótt að og unnið Sebastian (Vettel) og getum barist um meistaratitilinn", sagði Button.

„Ég hlakka til mótsins í Valencia. Mér gekk vel þar í fyrra og brautin hefur svipaða eiginleika og Montreal og Mónakó, þannig að ég er viss um að ég verði samkeppnisfær á ný. Galdurinn verður að sýna nóga góða frammistöðu í keppninni, til að bæta upp mögulega erfiðleika í tímatökunni. Það er erfitt að fara framúr og þó það verði DRS svæði (þar sem má opna afturvænginn), þá mun það ekki auðvelda hlutina á meðan mótinu stendur", sagði Button.

Lewis Hamilton féll úr leik í síðustu keppni eftir árekstur í við Button og í mótinu þar á undan náði hann í átta stig.

„Þessi tvö mót voru svekkjandi fyrir mig, af því við sýndum að við höfum hraðann til að vinna í báðum mótum, en ég náði aðeins átta stigum. En ég er samt ánægður að Jenson ók frábærlega til sigurs í Kanada, eftir að hafa verið óheppinn í Mónakó. Hann átti þennan árangur skilinn og þetta eru frábær úrslit fyrir liðið líka", sagði Hamilton.

„Mér hefur alltaf gengið vel í Valencia og hef náð öðru sæti í öllum mótum þar og finnst gaman að sækja á brautinni. Þetta er erfið braut sem veitir engan grið, en það mun ekki hindra mig, því ég er mjög áhugasamur að komast á brautina á ný og ná í stig. Þetta verður þriðja götumótið í röð og vonandi get ég snúið við því óláni sem ég upplifði í tveimur síðustu mótum."

„Við höfum að öllum líkindum verið með fljótasta bílinn í síðustu þremur mótum og það er hvetjandi, því ég veit að þegar það er nýtt að þá ættum við að geta lokið keppni í fremstu röð. Það er mitt markmið um næstu helgi", sagði Hamilton.