Vettel: Afsaknir eru tilgangslausar

Sebastian Vettel hjá Red Bull telur að lið sitt verði að svara velgengni McLaren og Ferrari í síðustu mótum með góðum árangri um helgina. Fernando Alonso vann á dögunum á Silverstone brautinni í Bretlandi og Lewis Hamilton á McLaren kom fyrstur í mark á Nürburgring brautinni í Þýskalandi á sunnudaginn.

Keppt verður á Hungaroring brautinni á sunnudaginn og á fyrstu æfingu í dag á Hungaroring brautinni var Lewis Hamilton með besta aksturstímann.

„Við erum búnir að fara yfir það sem gerðist og þurfum að einbeita okkur. Það þýðir ekki að hugsa um síðasta mót. Við lentum í þriðja og fjórða sæti. Það er engin hörmung, en við erum ekki ánægðir, en verðum að sætta okkur við það", sagði Vettel í frétt á autosport.com um það sem gekk á í síðasta móti.

„Markmið okkar er ekki þriðja og fjórða sæti. Við verðum að gera betur hérna (í Ungverjalandi) og við erum með nokkra hluti sem við getum leikið okkur að til að bæta möguleikanna. Það er ekki til neins að leita afsakanna vegna úrslitanna í síðustu keppni. Þeir sem voru á undan mér áttu það skilið, en ég ætla að snúa þessu mér í hag um helgina", sagði Vettel.

Hamilton varð á undan Alonso í þýskalandi og Mark Webber á Red Bull varð þriðji. Vettel sagðist hafa átt í vandræðum með stilla bílnum rétt upp fyrir Nürburgring brautina, en liðið sé búið að skoða hvað var í gangi. Hann hefur trú á að Ferrari liðið verði öflugt í Ungverjalandi.

„Hvert mót er ólíkt því sem á undan er. Við vorum samkeppnisfærir hérna í fyrra, en þetta er ekki bíll síðasta árs, heldur nýr bíll. Ég geri ráð fyrir að Ferrari og McLaren bílarnir verðir snöggir og ökumenn þessara liða okkar helstu keppinautar. Ferrari vex ásmeginn og er líklegt til afreka í þessu móti", sagði Vettel.

Sýnt verður frá æfingum keppnisliða í kvöld á Stöð 2 Sport kl. 20.30, en brautarlýsing er á kappakstur.is.