Góð skot á Tannastaðatanga

Það er víðar en í stóru ánum sem menn setja í laxa þessa dagana. Sindri Már Pálsson gerði ágætis túr í Sogið, nánar tiltekið á Tannastaðatanga, um daginn þegar hann og afi hans lönduðu tveimur flottum löxum og misstu einhverja. Núna þegar Sogið er aðeins seinna í gang en í venjulegu ári eru menn í góðri laxavon á þessu svæði og þeir sem lenda í göngum geta gert góða veiði.

Það góða við þetta svæði er að það er frekar auðveitt enda ekki um marga eiginlega veiðistaði að ræða. Veiðisvæðið er þar sem Sogið rennur út í Hvítá og liggur laxinn gjarnan í skilunum og oft er hann að ganga alveg uppí harða landi. Það hafa margir gert þau mistök þarna að byrja á því að vaða út í ánna í stað þess að byrja að veiða næst landi og vinna sig þannig út.

Þetta er í raun ágætis regla alveg sama hvar þú ert að veiða. Veiða fyrst þá laxa sem liggja við bakkann, síðan hina.