Valskonur meistarar meistaranna annað árið í röð

Íslandsmeistarar Vals unnu þriggja marka sigur á bikarmeisturum Fram, 30-27, í Meistarakeppni kvenna í handbolta en liðin mættust í þessum árlega leik í Vodafone-höllinni í kvöld.

Þetta er annað árið í röð sem Valur vinnur þennan fyrsta leik tímabilsins en Valur vann 25-23 sigur í leik sömu liða í Meistarakeppninni í fyrra.

Valskonur voru komnar með níu marka forskot, 27-18, þegar tíu mínútur voru liðnar af seinni hálfleik en Fram skoraði þá sjö mörk í röð og náði að setja smá spennu í leikinn. Þær komust hinsvegar ekki lengra og Valsliðið tryggði sér sannfærandi sigur.

Þorgerður Anna Atladóttir, nýr leikmaður Íslandsmeistarana, fór á kostum í Valsliðinu og skoraði tólf mörk, flest þeirra með glæsilegum þrumuskotum.

Valur-Fram 30-27 (17-11)

Mörk Vals: Þorgerður Anna Atladóttir 12, Dagný Skúladóttir 5, Hrafnhildur Ósk Skúladóttir 5, Anna Úrsúla Guðmundsdóttir 4, Ragnhildur Rósa Guðmundsdóttir 4.

Mörk Fram: Birna Berg Haraldsdóttir 7, Elísabet Gunnarsdóttir 6, Sigurbjörg Jóhannsdóttir 4, Guðrún Þóra Hálfdánsdóttir 3, Sunna Jónsdóttir 3, Marthe Sördal 1,  Stella Sigurðardóttir 1, Ásta Birna Gunnarsdóttir 1, Steinunn Björnsdóttir 1.