Ólíku saman að jafna í Dölunum

Fáskrúð í Dölum hafði á hádegi í gær gefið 211 laxa, og samkvæmt veiðimönnum er nokkuð af laxi í ánni. Það sama verður ekki sagt um nágrannaána Laxá í Dölum.

Fáskrúð virðist vera líkt og flestar Dalaárnar í slöku meðallagi, eða einfaldlega í meðaltalstölum. Sem dæmi er meðalveiði í Fáskrúð um 240 laxar sl. þrjá áratugi.

Eftir því sem við komumst næst er hið sama upp á teningnum í Haukadalsá í Dölum, ágætlega mikið af laxi en áin eins og flestar á þessum slóðum, hefur liðið fyrir vatnsþurrð í sumar.

Ástandið í Laxá í Dölum er hins vegar ekki gott. Þar standa veiðitölur á hádegi í dag í 509 löxum og stefnir að öllu óbreyttu í verstu lokatölu árinnar síðan 1980, eða í rúma þrjá áratugi. Það sumar veiddust aðeins 324 laxar í Laxá , og reyndar voru árin þar í kring mjög léleg.  Í seinni tíð hefur áin farið neðst í veiðitölum árið 2000 þegar að 600 laxar veiddust.

Ljóst má vera að lokatala nú verður undir 550 löxum enda aðeins nokkrir dagar eftir af veiðitímabilinu.

Birt með góðfúslegu leyfi SVFR