Button: Vettel á titilinn skilið

Jenson Button fagnaði sigri í japanska kappakstrinum í gær á McLaren, en Button var eini ökumaðurinn sem átti tölfræðilega möguleika á því að skáka Vettel í titilslagnum fyrir mótið í Japan.

Button þurfti að vinna mótið, sem hann gerði, en Vettel mátti ekki fá stig úr mótinu til að vonir Button um titilinn væru enn til staðar eftir það. Vettel náði þriðja sæti í Japan og fékk 15 stig og tryggði sér þannig meistaratitilinn í ár.

Button ræsti annar af stað í mótinu í gær og reyndi að komast framúr Vettel í upphafi, en það gekk ekki upp, en hann komst framúr Vettel í 21 hring mótsins eftir þjónustuhlé og það var lykillinn að sigri hans á Suzuka brautinni.

„Þetta var erfitt mót, síðustu fimm hringir voru sérlega erfiðir, þar sem ég þurfti að passa upp á dekkin og spara eldsneyti til að komast á leiðarenda. En þetta var magnaður sigur," sagði Button.

„Sebastian (Vettel) sveigði í átt að mér eftir ræsinguna og nálgaðist stöðugt, þannig að ég keyrði út á grasið og þurfti að slá af. Að öðrum kosti hefði orðið hörkuárekstur í fyrstu beygju. Hann sagðist ekki hafa séð mig, fyrr en ég var að hægja á mér og ég tapaði sæti," sagði Button um mótið í gær, en við þetta atvik féll hann í þriðja sæti, á eftir Vettel og Lewis Hamilton, liðsfélaga sínum hjá Mclaren. En að lokum stóð Button uppi sem sigurvegari.

„Það var gefandi að vinna sig upp og bíllinn var góður alla helgina. Þetta var tilfinningaríkur sigur. Brautin á sér mikla sögu og áhorfendur hafa verið undraverðir. Þetta er eins og sigur á heimavelli fyrir mig."

Button kvaðst vilja þakka hverri einustu persónu í Japan sem hefði stutt McLaren og kvaðst vonast til að heimamenn ættu góðar minningar um mótið, vegna þess að japanska þjóðin hefur gengið í gegnum erfiða tíma á þessu ári vegna náttúruhamfaranna í mars.

„Seb (Vettel) hefur skilað góðri vinnu á árinu og á titilinn skilið. Hann fékk búnað og gerði það sem hann þurfti að gera. En við getum afrekað meira á árinu. Ég hefði yndi af því að berjast til sigurs í næstu mótum. Ég tel að við séum með bílinn og liðið til að gera slíkt. Við munum sækja fram til að vinna fleiri sigra á árinu og erum á góð stað til þess. Það er lykill á góðu tímabili árið 2012," sagði Button.