Eins og að halda tónleika heima í stofu

„Þetta verða fyrstu alvöru tónleikarnir þar sem við spilum saman svo við hlökkum mikið til," segir Jón Jónsson, tónlistarmaður, sem heldur tónleika ásamt bróður sínum Friðriki Dór á föstudaginn kemur.

Tónleikarnir fara fram í Bæjarbíói í Hafnarfirði, en þeir bræður eru gallharðir Gaflarar. Það seldist fljótt upp á tónleikana, sem byrja klukkan 19:30, og því hafa þeir bræður nú ákveðið að halda auka tónleika síðar um kvöldið, eða klukkan 22. „Við erum auðvitað gríðarlega þakklátir fyrir þessar góðu móttökur og vonum bara að það verði ekki hálftómt á seinni tónleikunum," segir Jón, léttur í bragði.

Jón segir að tónleikarnir verði mjög forvitnilegir en vill þó ekki meina að þetta séu sérstakir jólatónleikar. „Dagskráin verður aðallega skipuð lögum eftir okkur sjálfa, en ætli við læðum ekki inn nokkrum jólalögum - það verður að gera það á þessum árstíma."

Á sviðinu verður hljómsveit en stemmingin verður á heimilislegum nótum. „Bæjarbíó er frábær salur sem býður upp á mikla nánd, svo þetta verður kannski svolítið eins og að halda tónleika heima í stofu," segir Jón.

„Við erum þarna að spila í okkar heimabyggð og vonumst eftir að sem flestir Hafnfirðingar mæti á svæðið, þó svo að utanbæjarfólk sé velkomið líka, að sjálfsögðu," segir hann að lokum.

Hægt er að nálgast miða á tónleikana á midi.is.

Í meðfylgjandi myndskeiði má sjá innslag með bræðrunum í Íslandi í dag í fyrra þar sem þeir taka jólalagið "Hátíð í bæ".