Óskar fellur fyrir kóngi

Á sunnudagskvöldið er komið að því að kvenkynsstjörnur Hollywood eyði milljónum í útlit sitt og karlarnir troði jafnvel bótoxi í ennið sitt. Það er nefnilega Óskarskvöld, mesta glamúrveisla ársins þar sem tár, gremja og gleði ráða ríkjum.

Þau Anne Hathaway og James Franco eru kynnar kvöldsins og gestir Kodak-hallarinnar eiga því von á fremur ljúfum móttökum, ólíkt síðustu Golden Globe-athöfn þar sem Ricky Gervais skaut á allt kvikt.

Óskarinn er stærstu verðlaun kvikmyndabransans og sú viðurkenning sem flestir kvikmyndagerðarmenn þrá (nema kannski leikkonur því yfirleitt skilja þær við eiginmenn sína eftir að hafa komist á snoðir um framhjáhald þeirra eftir að hafa fengið styttuna í hendurnar).

Úrslitin á Óskarnum þykja nokkuð gefin þetta árið. Thariq Khan, kvikmyndaspekúlant Fox-sjónvarpsstöðvarinnar, hefur verið ótrúlega sannspár undanfarin fjögur ár og hann lýsir því yfir á vefsíðu sinni að The King‘s Speech hljóti Óskarinn í ár sem besta kvikmyndin.

„Það eru áttatíu prósenta líkur á því, ég hef aldrei séð The Social Network sem Óskarsmynd þótt hún hafi vissulega verið frábær,“ skrifar Khan og bætir því við að margir í bandarísku Akademíunni sjái The King‘s Speech sem afturhvarf til stórmynda á borð við Arabíu-Lawrence og Umhverfis jörðina á 80 dögum.

Khan brýtur ekkert blað í spádómum sínum um aðalleikarana því himinn og jörð munu farast ef Natalie Portman fær ekki Óskarinn fyrir Black Swan og Colin Firth verður sniðgenginn fyrir túlkun sína á hinum stamandi kóngi. Þau tvö hafa sópað til sín öllum helstu leikaraverðlaununum og akademían verður sér til skammar ef hún horfir framhjá þeim.

Christian Bale þykir nokkuð öruggur, að mati Khan, um Óskarinn fyrir frammistöðu sína sem ólánsamur bróðir Mark Wahlberg í The Fighter en mesta spennan virðist vera í kringum aukaleikkonurnar. Khan er nokkuð djarfur í þeirri spá sinni og trúir því að Melissa Leo fari heim með styttuna góðu fyrir leik sinn í The Fighter.

„Það eru meiri en helmingslíkur á því. Þetta er samt eini leikaraflokkurinn sem er eitthvað spennandi,“ skrifar Khan.

Óskarinn verður í beinni útsendingu á Stöð 2 og hefst útsending klukkan hálf tvö. Ívar Guðmundsson og Skarphéðinn Guðmundsson lýsa því sem fyrir augu ber en útsendingin stendur í þrjá og hálfan tíma.

Tæplega klukkutíma fyrr er reyndar útsending frá rauða dreglinum sem áhugafólk um tísku og dýra kjóla ætti ekki að láta framhjá sér fara.

freyrgigja@frettabladid.is