Killers vinnur að nýju efni

Las Vegas-hljómsveitin The Killers hefst handa við að semja nýtt efni í næstu viku, samkvæmt trommaranum Ronnie Vannucci.

Vannucci lýsti því yfir í viðtali á útvarpsstöðinni XFM í London að meðlimir The Killers ættu hrúgu af hugmyndum að lögum sem þeir vilji leyfa hver öðrum að heyra. Þá bætti hann við að þeir væru búnir að ákveða að hittast þriðjudaginn 17. maí. „Við ætlum að koma saman og byrja að vinna," sagði hann.

The Killers sendi síðast frá sér plötuna Day & Age árið 2008, sem var þriðja plata hljómsveitarinnar. Meðlimir The Killers hafa einbeitt sér að eigin verkefnum undanfarin misseri og söngvarinn Brandon Flowers sendi til að mynda frá sér nokkuð vel heppnaða sólóplötu í fyrra.

Hér fyrir ofan má sjá myndband af einu þekktasta lagi sveitarinnar, Mr. Brightside.