Áfengislaus tónleikaröð Arnars

Kaffi, kökur & rokk & ról nefnist ný tónleikaröð sem hefst í Vonar-húsi SÁÁ þriðjudaginn 6. september. Fram koma Benni Hemm Hemm og Prins Póló.

Benedikt Hermann Hermannsson er fluttur til Íslands eftir þriggja ára búsetu í Skotlandi og hlakkar mikið til að koma fram. „Hún lítur vel út þessi tónleikaröð og það er alltaf gaman að spila fyrir edrú fólk. Það verður afslappaðri stemning sem er alltaf mjög skemmtilegt,“ segir Benni, sem er að fara aftur í gang með hljómsveitina sína. Hún ætlar að spila mánaðarlega á Faktorý og verða næstu tónleikar þar 21. september.

Blaðamaðurinn Arnar Eggert Thoroddsen er dagskrárstjóri tónleikaraðarinnar Hann fór í gang með verkefnið eftir að hafa fengið símtal frá Gunnari Smára Egilssyni, formanni SÁÁ. „Gunnar Smári hringdi í mig í sumar og bað mig um að sjá um þessa röð fyrir SÁÁ. Ég gerði það með glöðu geði enda á ég þessum samtökum líf mitt að þakka,“ segir Arnar Eggert, sem hefur verið edrú í eitt og hálft ár.

Tónleikaröðin, sem verður á þriðjudögum, verður haldin stundvíslega frá 20 til 22 og kaffi og kökur verða á boðstólum. Að sjálfsögðu verður áfengi hvergi nærri. „Það sem við erum að reyna með þessu er að búa til tónleikaröð sem snýst um tónleika, eins barnalega og það hljómar,“ segir Arnar Eggert. „Þetta á að vera eitthvað fyrir sælkerann, að hann geti komið í upphafi viku, og notið tónlistarinnar án þess að eyða fimm til sex tímum af dýrmætum helgartíma í það.“

Á meðal annarra flytjenda sem hafa boðað komu sína eru Mugison, Jónas Sig, Agent Fresco, Lára, Skálmöld og Stórsveit Samúels Jóns Samúelssonar. - fb