Kóngurinn í kvikmyndum

Ef sá dagur rynni upp að kvikmyndaleikstjóri í Hollywood yrði gripinn mikilmennskubrjálæði (sem reyndar gerist örugglega á hverjum degi) og vildi krýna sjálfan sig konung borgarinnar myndu fæstir hreyfa við andmælum ef sá maður væri Steven Spielberg.

Nýjasta kvikmynd Stevens Spielberg, Ævintýri Tinna, verður frumsýnd um helgina. Aðdáendur blaðamannsins snjalla sem listamaðurinn Hergé gerði ódauðlegan í bókum sínum hafa beðið spenntir eftir að sjá hvernig Spielberg tekst upp. Og það skemmir eflaust ekki fyrir að Peter Jackson, maðurinn á bak við Hringadróttinsþríleikinn, situr í aðalframleiðandastólnum. Söguþráður myndarinnar er mjög einfaldur; Tinni og Kolbeinn kafteinn halda af stað í fjársjóðsleit þegar þeir reyna að finna sjóræningjaskip sem forfaðir Kolbeins stýrði.

Ævintýri Tinna er fyrsta kvikmynd Spielbergs í þrjú ár, frá því að hann leikstýrði upprisu Indiana Jones. Þetta er jafnframt fyrsta teiknimynd Spielbergs en myndin er gerð með svokallaðri „motion capture"-tækni sem byggist á því að alvöruleikarar búa til hreyfingarnar, sem síðan eru færðar inn í tölvu og „kvikaðar". Fáum kemur það á óvart að Andy Serkis skuli leika í myndinni – hann er Kolbeinn kafteinn – því sá ágæti maður er fyrsta og eina stjarna þessarar tækni; hann var Gollum í Hringadróttinssögu og King Kong í samnefndri kvikmynd Jacksons. Jamie Bell fer hins vegar með hlutverk Tinna.

Ferill Spielbergs er einstakur í Hollywood, hægt væri að telja feilsporin á fingrum annarrar handar en smellirnir eru nánast endalausir. Enda auðæfi leikstjórans metin á þrjá milljarða Bandaríkjadollara, síðustu þrjú ár hefur hann haft yfir hundrað milljónir dollara í árslaun samkvæmt Forbes. Þrátt fyrir velgengnina hefur leikstjóranum tekist að halda persónu sinni fjarri kastljósi fjölmiðla að mestu; hann er tvígiftur og á sjö börn, þar af tvö ættleidd.

Ferill Spielbergs hófst fyrir alvöru með kvikmyndinni The Sugarland Express árið 1974 en í kjölfarið komu kvikmyndir á borð við Jaws, Close Encounters of the Third Kind, Raiders of the Lost Ark og E.T.; listinn er nánast ótæmandi. Spielberg notaði sín fyrstu skref til að gera tilkomumiklar ævintýramyndir en hann getur vel gert dramatíkinni góð skil, eins og kvikmyndirnar The Color Purple, Empire of the Sun og Schindler's List sýna vel. Spielberg er hins vegar á heimavelli þegar ævintýri eru annars vegar, þar er hann fremstur meðal jafningja í þeim hring.

Það lá alltaf fyrir að Spielberg myndi gera kvikmynd eftir Tinnabókunum. Eftir að einn gagnrýnandi hafði lýst því yfir að fyrsta Indiana Jones-myndin væri eins og Tinnabók pantaði Spielberg allar bækurnar á frummálinu og þrátt fyrir að hafa ekki skilið neitt varð hann umsvifalaust ástfanginn af myndlist þeirra. Hergé lýsti því síðan sjálfur yfir að Spielberg væri eini leikstjórinn sem gæti komið Tinna á hvíta tjaldið.

freyrgigja@frettabladid.is