Formúlu 1 lið Force India frumsýnir á vefnum kl. 14:00

Frumsýning verður á nýja Force India keppnisbílnum kl. 14.00 í dag á vefnum, en þá verða Adrian Sutil, Paul di Resta og Nico Hulkenberg kynntir sem ökumenn liðsins í ár. Sutil var hjá liðinu í fyrra, en di Resta og Hulkenberg eru nýliðar. Di Resta varð meistari í DTM mótaröðinni í Þýskalandi í fyrra með Mercedes, en Hulkenberg ók hjá Williams. Hulkenberg verður varaökumaður Force India, en honum tókst ekki að finna sæti aðalökumanns í ár, en umboðsmaður hans er Willy Weber, sem hefur verið umboðsmaður Michael Schumacher. Frumsýning Force India verður á heimasíðu liðsins, sem er http://www.forceindiaf1.com.