Tíu urriðar á dag í Elliðaánum

Veiðst hafa um það bil tíu urriðar að meðaltali á dag á tvær stangir í Elliðaánum síðan veiði hófst.

Vorveiðin í Elliðaánum hófst 1. maí . Eins og áður sagði er veitt á tvær stangir og eingöngu fluga er leyfð. Veiðisvæðið nær frá Höfuðhyl að og með Hrauni. Bestu hyljirnir í vorveiðinni eru Höfuðhylur og Ármót. Síðastliðið vor veiddust rétt tæplega 250 urriðar.

Þorsteinn Húnbogason veiðivörður segir of snemmt að segja nokkuð til um það hvort veiðin verði betri eða verri en í fyrra. Hann segir veiðina hafa gengið alveg ágætlega þá sex daga sem liðnir eru af veiðitímabilinu. Algengt sé að 3 til 5 fiskar veiðist á hverri vakt eða um 10 á hverjum degi.

Gísli Harðarson og veiðifélagi hans náðu átta urriðum á morgunvaktinni á fimmtudaginn. Öllum fiskunum var sleppt. Sá minnsti var 33 sentímetrar en sá stærsti 50. Fiskarnir veiddust allir ofarlega. Einn í Höfuðhyl en hinir í Hólmatagli (Brúarhyl). Flugurnar sem urriðarnir tóku voru púpur, með krókastærð tíu eða tólf. Þrír fiskanna tóku Watson Fancy kúluhaus, hinir tóku Glóðina, Jock og Killer.

Gísli sagði að mikið vatn hefði verið í ánni og allir fiskarnir hefðu veiðst andstreymis.