Haraldur Franklín: Hlynur er búinn með bensínið

Haraldur Franklín Magnús úr GR er að leika í fyrsta sinn í úrslitum á Íslandsmótin í holukeppni en hann sigraði Rúnar Arnórsson úr Keili 1/0 í undanúrslitum í morgun á Leirdalsvelli. Haraldur lék gríðarlega vel í morgun og fékk 5 fugla. Hlynur Geir Hjartarson úr Golfklúbbi Selfoss verður mótherji Haraldar í úrslitaleiknum.

„Ég hef tvívegis leikið til úrslita á Íslandsmóti unglinga í holukeppni, unnið einu sinni og tapað einu sinni. Þetta eru búnir að vera skemmtilegir og spennandi hringir fram til þessa. Og ég á alveg nóg eftir en líklega er Hlynur Geir er búinn með bensínið en ég á aðeins meira eftir en hann," sagði Haraldur og brosti en hann er 21 árs gamall en Hlynur Geir er töluvert eldri og reyndari. Haraldur sigraði Andra Þór Björnsson úr GR í átta manna úrslitum í gær og réðust úrslitin ekki fyrr en á 21. holu í bráðabana.

„Rúnar byrjaði rosalega vel gegn mér í dag, hann fékk þrjá fugla í röð, og átti tvær eftir þrjár holur. Ég náði að jafna á 13. holu. Völlurinn er fínn eins og hann er í dag en þegar hann er „grjótharður" þá finnst mér hann hundleiðinlegur," sagði Haraldur en félagi hans Bjarni Rúnar Jónasson er aðstoðarmaður hans á þessu móti. „Hann er stórkylfingur og mjög góður í golfi," bætti Haraldur við.