Hamilton verður á ráspól í Ungverjalandi

Lewis Hamilton á McLaren mun ræsa á ráspól í ungverska kappakstrinum á morgun. Hamilton var heilum fjórum tíundu úr sekúndu á undan Romain Grosjean á Lotus. Romain hefur aldrei ræst ofar í Formúlu 1.

Sebastian Vettel var í örlitlum vandræðum í Red Bull-bílnum sínum og það var ekki fyrr en hann komst á mýkri dekkin og í síðustu umferð tímatökunnar sem hann sýndi raunverulegan hraða bílsins. Vettel þurfti þó að taka á öllu sínu til að kreista það út.

Liðsfélagi Hamiltons, Jenson Button, fann ekki gripið sem greinilega er að finna í McLaren-bílnum og ræsir fjórði á undan Kimi Raikkönen á Lotus.

Ferrari-félagarnir Fernando Alonso og Felipe Massa munu ræsa í sjötta og sjöunda sæti. Massa var næstum því búinn að skáka liðsfélaga sínum í fyrsta sinn í ár. Alonso tók það samt greinilega ekki í mál. Alonso átti þó í svipuðum vandræðum og Vettel, þurfti að kreista allt það sem hann gat út úr bílnum.

Þeir Pastor Maldonado og Bruno Senna á Williams munu ræsa í áttunda og níunda sæti. Þetta er í fyrsta sinn í ár sem þeir eru báðir í síðustu lotu tímatökunnar.

Mark Webber á Red Bull komst ekki upp úr annari lotu og ræsir ellefti. Báðir Mercedes-bílarnir komustu heldur ekki upp úr annari lotu. Nico Rosberg ræsir þrettándi og Michael Schumacher sautjándi.

Alonso þarf að nýta kappaksturinn á morgun til að halda forystu sinni í heimsmeistaraslagnum. Sjötta sætið í ræsingu er ekki vel til þess fallið en Alonso hefur áður sýnt að hann er í raun göldróttur við stýrið. Það er því von á flugeldasýningu í kappakstrinum á morgun sem hefst klukkan 12 og er í beinni útsendingu á Stöð 2 Sport.

Rásröðin í ungverska kappakstrinum

nr.	Ökuþór	Bíll / Vél	Tími	Bil
1	Lewis Hamilton	McLaren/Mercedes	1'20.953	-
2	Romain Grosjean	Lotus/Renault	1'21.366	0.413
3	Sebastian Vettel	Red Bull/Renault	1'21.416	0.463
4	Jenson Button	McLaren/Mercedes	1'21.583	0.63
5	Kimi Räikkönen	Lotus/Renault	1'21.730	0.777
6	Fernando Alonso	Ferrari	1'21.844	0.891
7	Felipe Massa	Ferrari	1'21.900	0.947
8	Pastor Maldonado	Williams/Renault	1'21.939	0.986
9	Bruno Senna	Williams/Renault	1'22.343	1.39
10	Nico Hülkenberg	Force India/Mercedes	1'22.847	1.894
11	Mark Webber	Red Bull/Renault	1'21.715	0.762
12	Paul Di Resta	Force India/Mercedes	1'21.813	0.86
13	Nico Rosberg	Mercedes	1'21.895	0.942
14	Sergio Pérez	Sauber/Ferrari	1'21.895	0.942
15	Kamui Kobayashi	Sauber/Ferrari	1'22.300	1.347
16	Jean-Eric Vergne	Toro Rosso/Ferrari	1'22.380	1.427
17	M.Schumacher	Mercedes	1'22.723	1.77
18	Daniel Ricciardo	Toro Rosso/Ferrari	1'23.250	2.297
19	H.Kovalainen	Caterham/Renault	1'23.576	2.623
20	Vitaly Petrov	Caterham/Renault	1'24.167	3.214
21	Charles Pic	Marussia/Cosworth	1'25.244	4.291
22	Timo Glock	Marussia/Cosworth	1'25.476	4.523
23	Pedro de la Rosa	HRT/Cosworth	1'25.916	4.963
24	N.Karthikeyan	HRT/Cosworth	1'26.178	5.225