Hættið að skarka utanvega á veiðislóð!

Ljót sár eru nú í jarðvegi eftir ökutæki veiðimanna í Hraunsfirði að því er segir á veg Stangaveiðifélags Reykjavíkur sem skorar á veiðimenn að keyra ekki utan vega í botni fjarðarins.

"Undanfarið hefur jörð verið blaut og ljót bílför myndast að ánni í botni fjarðarins. Síðla sumars virðist það freista veiðimanna að huga að árkjaftinum innst í Hraunsfirði. Á meðan jörð var þurr keyrðu veiðimenn langleiðina inn í botn, en mikil úrkoma undanfarnar vikur hefur gert það að verkum að jörð er mjög blaut. Hins vegar hafa einhverjir freistast til að keyra stærri ökutæki inn fjörðinn og skilið eftir sig ljót sár í jarðveginum," segir á svfr.is þar sem menn eru beðnir um aka ekki utanvega, hvorki í Hraunsfirði né annars staðar.

gar@frettabladid.is