Ragnar Már Garðarsson, kylfingur úr GKG, sigraði í dag á Duke of York mótinu sem fram fór á hinum þekkta Royal Troon vellinum í Skotlandi. Mótið er gríðarlega sterkt alþjóðlegt móti fyrir unga áhugakylfinga og hafði Ragnar betur á þriðju holu í bráðabana gegn þeim Max Orrin frá Englandi og Katja Pogacar frá Slóveníu, en á þessu móti keppa stúlkur og drengir í sameiginlegum flokki. Kylfingur.is greinir frá.
Þetta er í annað sinn á síðustu þremur árum sem íslenskur kylfingur sigrar á þessu móti. Guðmundur Ágúst Kristjánsson úr GR sigraði árið 2010 en þá fór mótið fram á Royal St. George‘s á Englandi.
Aðstæður á Royal Troon vellinum voru erfiðar alla þrjá keppnisdagana en Ragnar lék sinn besta hring í dag eða á 72 höggum sem er par vallarins. Hann fékk fugl á 16. og 17. braut sem varð til þess að hann komst í bráðbana um sigurinn.
Ragnar Már var á dögunum valinn efnilegasti kylfingur landsins ásamt Önnu Sólveigu Snorradóttur úr GK á lokahófi Golfsambands Íslands. Ragnar varð Íslandsmeistari í höggleik í flokki 17-18 ára Kiðjabergsvelli í júlí og hann varð einnig stigameistari á Arion-bankamótaröð unglinga.
Guðrún Brá Björgvinsdóttir úr GK tók einnig þátt á mótinu en hún endaði í 27.-30. sæti.
Stjarnan
ÍBV
