Red Bull með yfirburði í tímatökunum fyrir japanska kappaksturinn

Heimsmeistarinn Sebastian Vettel mun ræsa japanska kappaksturinn á morgun á ráspól á undan liðsfélaga sínum Mark Webber. Vettel hafði ótrúlega yfirburði í tímatökunum og ók 0,2 sekúntum hraðar en liðsfélagi sinn og 0,4 sekúntum hraðar en Jenson Button.

Button stýrði McLaren-bíl sínum um Suzuka-brautina og setti þriðja besta tíma í síðustu lotunni. Hann fær fimm sæta refsingu á ráslínu því hann skipti um gírkassa á milli móta. Hann ræsir því áttundi.

Heimamaðurinn Kamui Kobayashi á Sauber ræsir þriðji. Hann náði fjórða besta tíma. Romain Grosjean á Lotus ræsir fjórði og liðsfélagi Kobayashi, Serigo Perez fimmti.

Fernando Alonso ók eina Ferrari-bílnum sem komst í síðustu lotuna og náði sjöunda besta tíma og ræsir sjötti á undan Kimi Raikkönen á Lotus.

Kimi gæti hafa eyðilagt fyrir fleirum en sjálfum sér þegar hann snéri bíl sínum út af brautinni þegar allir tíu ökumennirnir í síðustu lotunni óku síðasta tímatökuhring sinn. Gulum flöggum var veifað sem eyðilagði tímatökuhringi nokkurra ökuþóra, meðal annars Lewis Hamilton.

Það er vafamál hvort bestu hringtímar Buttons og Kobayashi hafi verið settir undir gulum flöggum. Reglurnar segja að ekki megi bæta tíma sinn á þeim svæðum þar sem gulum flöggum er veifað.

Hamilton mun ræsa McLaren-bíl sinn úr níunda sæti á ráslínu. Tímatakan verður að teljast nokkur vonbrigði fyrir McLaren-liðið þar sem þeir eru taldir hafa, að minnsta kosti, annan besta bílinn í Formúlu 1.

Nico Hulkenberg var tíundi maður í síðustu lotu tímatökunnar en hann setti ekki hringtíma og fær fimm sæta refsingu eins og Button. Hulkenberg ræsir því fimmtándi.

Michael Schumacher ræsir næst síðastur í Mercedes-bíl sínum. Hann hlaut tíu sæta refsingu fyrir að aka aftan á Jean-Eric Vergne í Singapúr fyrir tveimur vikum. Síðasti kappakstur meistarans í Japan verður því áhugaverður, sérstaklega því Schumi var fljótari en liðsfélagi sinn í tímatökunum.

Rásröðin í japanska kappakstrinum á morgun

NR	Ökumaður	Lið / vél	Tími	Bil
1	Sebastian Vettel	Red Bull/Renault	1'30.839	-
2	Mark Webber	Red Bull/Renault	1'31.090	0.251
3	Kamui Kobayashi	Sauber/Ferrari	1'31.700	0.861
4	Romain Grosjean	Lotus/Renault	1'31.898	1.059
5	Sergio Pérez	Sauber/Ferrari	1'32.022	1.183
6	Fernando Alonso	Ferrari	1'32.114	1.275
7	Kimi Räikkönen	Lotus/Renault	1'32.208	1.369
8	Jenson Button	McLaren/Mercedes	1'31.290	0.451
9	Lewis Hamilton	McLaren/Mercedes	1'32.327	1.488
10	Felipe Massa	Ferrari	1'32.293	1.454
11	Paul Di Resta	Force India/Mercedes	1'32.327	1.488
12	Pastor Maldonado	Williams/Renault	1'32.512	1.673
13	Nico Rosberg	Mercedes	1'32.625	1.786
14	Daniel Ricciardo	Toro Rosso/Ferrari	1'32.954	2.115
15	Nico Hülkenberg	Force India/Mercedes	-	-
16	Jean-Eric Vergne	Toro Rosso/Ferrari	1'33.368	2.529
17	Bruno Senna	Williams/Renault	1'33.405	2.566
18	H.Kovalainen	Caterham/Renault	1'34.657	3.818
19	Timo Glock	Marussia/Cosworth	1'35.213	4.374
20	Pedro de la Rosa	HRT/Cosworth	1'35.385	4.546
21	Charles Pic	Marussia/Cosworth	1'35.429	4.59
22	Vitaly Petrov	Caterham/Renault	1'35.432	4.593
23	M.Schumacher	Mercedes	1'32.469	1.63
24	N.Karthikeyan	HRT/Cosworth	1'36.734	5.895