Kylfingurinn Charlie Beljan átti dramatíska helgi á Disney-mótinu í golfi. Hann var borinn út á sjúkrabörum eftir annan hringinn en tókst samt að vinna mótið.
Beljan er nýliði á PGA-mótaröðinni og hann fékk svo svakalegt hræðslukast eftir annan hringinn að hann hélt að hjartað væri á leið úr líkamanum.
Það var mikið undir hjá honum. Ef hann hefði ekki náð góðum árangri á mótinu hefði hann misst keppnisleyfið sitt á PGA-mótaröðinni. Með sigrinum tryggði hann sig inn á mótaröðina í tvö ár.
"Draumar rætast hjá Disney. Það er staðfest," sagði brosandi Beljan eftir keppnina.
Hann brosti ekki mikið á spítalanum þegar hann var þar með allt of háan blóðþrýsting. Hann svaf aðeins í klukkutíma fyrir þriðja hringinn og óttaðist allan hringinn að hann fengi annað kast.
Í gærmorgun var honum illt í maganum og með svima eftir allt álagið. Engu að síður tókst honum að spila frábærlega og vinna mótið. Magnað afrek.
Brosandi Beljan vann Disney-mótið
