De Villota fær að fara heim af spítalanum - ekki fyrir viðkvæma

Spænska ökufreyjan Maria de Villota sem lenti í hryllilegu slysi í júlí í ár fékk að fara heim af spítalanum á dögunum eftir að hafa gengist undir enn eina aðgerðina í lok nóvember. De Villota var tilraunaökumaður Marussia-liðsins.

Hún var að reynsluaka keppnisbíl Marussia-liðsins þegar hún lenti í hryllilegu slysi, sem hefðu getað kostað líf hennar ef ekki hefði verið fyrir snarræði lækna. Hún missti stjórn á bílnum og ók á vörubretti flutningabíls og slasaðist mjög mikið á höfði, með þeim afleiðingum að hún missti hægra augað.

De Villota þarf að fara í eina aðgerð til viðbótar þegar hún hefur jafnað sig á síðustu aðgerð. Hún hélt blaðamannafund í október þar sem hún sagðist hafa áhuga á því að snúa aftur í mótorsport ef hún fengi til þess leyfi. Annars vill hún berjast fyrir auknu öryggi í þessari hættulegu íþrótt.

Á sama blaðamannafundi sagði hún frá því að hún hefði misst allt lyktar- og bragðskyn auk þess að hún sé með stöðugan höfuðverk. De Villota birti svo sjokkerandi teikningu af meiðslum sínum og mölvaðri höfuðkúpunni.