HRT gjaldþrota og keppir ekki 2013

HRT-liðið mun ekki keppa í Formúlu 1 á næsta ári þar sem liðið er nánast gjaldþrota. Eigandi liðsins hefur verið að leita að kaupanda en enginn gerði tilboð í þetta spænska keppnislið.

Liðið getur ekki tekið þátt í Formúlu 1 á næsta ári því það gat ekki borgað skráningarfé á föstudaginn. FIA innheimti hærra skráningargjald í ár en það hefur áður gert. Gjaldið sem HRT þurfti að borga hækkaði þó ekki því liðið endaði neðst í stigabaráttunni í ár.

Thesan Capital á HRT-liðið en það hefur verið til sölu síðan í byrjun nóvember. Samkvæmt heimildum breska kappaksturstímaritsins Autosport, hafði kínverskur bílaframleiðandi áhuga á að bjarga liðinu.

Þá er haft eftir heimildarmönnum að liðið muni loka verksmiðjum sínum og borga kröfuhöfum áður en það verður lagt niður. Forsvarsmenn liðsins hafa annars ekki viljað tjá sig við fjölmiðla.

Saga liðsins er stutt og full af peningavandræðum. Í sumar virtust hjólin vera farin að snúast á tímabili, þegar liðið nálgaðist Marussia neðst á töflunni. Þær vonir urðu að engu þegar peningavandræðin urðu enn meiri á seinni helmingi tímabilsins.

Það aka því aðeins 11 lið og 22 bílar í Formúlu 1 á næsta ári. Martin Brundle, fyrrum keppnisökuþór í Formúlu 1 og álitsgjafi Sky Sports um Formúlu 1, bendir á að þetta gæti verið merki um að kostnaður í Formúlu 1 sé of ógnvekjandi fyrir litlu liðin. Með nýjum vélum árið 2014 segir hann að líklegra sé að keppnislið fái leyfi til að endurnýta bíla milli ára, án þess að þurfa að uppfylla sömu skilyrði og nýju bílarnir.

Bernie Ecclestone sagðist í sumar vera opinn fyrir þeirri hugmynd en á víst bágt með að sjá hana í framkvæmd. Hún sé hins vegar góð því það lækki kostnað keppnisliðanna og geri þeim lífið bærilegra. Auk þess gæti keppnin orðið harðari í neðri hluta töflunnar.