Facebook-samskipti í raunheimi

Halldóra Rut Baldursdóttir og Katrín Halldóra Sigurðardóttir, leiklistarnemar við Listaháskóla Íslands, vinna að lítilli, sjálfstæðri leiksýningu sem frumsýnd verður föstudaginn 25. maí á heimili Halldóru í Grjótaþorpinu. Sýningin nefnist Heim og er alfarið byggð á Facebook-færslum.

„Við vorum að velta fyrir okkur samskiptum fólks á Facebook þegar okkur datt í hug að það gæti verið gaman að glæða þetta lífi í leikhúsinu og allt í einu vorum við komnar út á gólf og farnar að vinna með þessa hugmynd. Það mætti því segja að þetta sé rannsókn sem óvart varð að sýningu," útskýrir Halldóra og bætir við að ferlið hafi fengið þær til að endurmeta tilganginn með notkun Facebook.

Stúlkurnar eru báðar virkar á samskiptasíðunni og viðurkenna að það hafi komið þeim á óvart hversu stóran þátt Facebook spilar í daglegu lífi manna.

„Meiri hluti þjóðarinnar er á Facebook, meira að segja ungbörn og ömmur og afar eru virk á samskiptasíðunni. Í dag virðist maður ekki vera maður með mönnum nema maður sé á Facebook," segir Halldóra og bætir við: „Það sem okkur langaði að prufa að gera er að eiga í Facebook-samskiptum í raunheiminum. Ég veit ekki hvort okkur hafi tekist það, það er áhorfenda að dæma um það."

Leiksýningin verður frumsýnd þann 25. maí á heimili Halldóru í Mjóstræti 3. Áætlaðar eru fjórar sýningar á verkinu og rúmast um tíu manns á hverri sýningu. Frekari upplýsingar er hægt að nálgast á Facebook-síðu leikhópsins Þrettán svartir kettir undir stiga. -sm