Söngleikjaplata frá söngvara ársins

Þór Breiðfjörð er með einsöngsplötu í undirbúningi þar sem lög úr söngleikjum verða áberandi. „Mig langar að taka fleiri stór lög sem hafa jafnvel ekki verið sungin inn á plötu, til dæmis Óperudrauginn. Svo verða frumsamin lög eftir góða höfunda sem ég hef verið að skoða. Þetta verður góð blanda," segir Þór, sem hyggur einnig á upptökur á hefðbundnari dægurlagaplötu á næsta ári.

Þór var kjörinn söngvari ársins á Grímuverðlaununum fyrir frammistöðu sína í söngleiknum Vesalingunum í Þjóðleikhúsinu. Hann segir að rosalega indælt hafi verið að vinna verðlaunin og að þau hafi komið sér á óvart. „Mér skilst að Íslenska óperan hafi tekið þetta mikið undanfarin ár hún var með mjög sterka söngvara í flokknum, fyrir utan það að félagi minn Egill Ólafsson, sem er goðsögn sjálfur, var þarna með. Þannig að maður var með krosslagða fingur."

Þór flutti nýlega heim til Íslands eftir fjórtán ára útivist. Hann þekkir Vesalingana vel því hann fór með hlutverk í söngleiknum í tvö ár á West End í London og ferðaðist auk þess með sýninguna um Skandinavíu með öðrum norrænum söngvurum. Sýningum á Vesalingunum lýkur í Þjóðleikhúsinu í lok júní. -fb