Milljarða hagnaður

Eignabjarg, eignaumsýslufélag í eigu Arion banka, hagnaðist um 3,3 milljarða króna í fyrra. Eignir félagsins námu 15,6 milljörðum króna um síðustu áramót. Þar munaði langmestu um hagnað af eignarhlutum í eigu félagsins en það skilaði 3,3 milljarða króna hagnaði.

Eignabjarg ber ábyrgð á umsýslu og ráðstöfun þeirra eignarhluta í fyrirtækjum sem Arion banki hefur leyst til sín í kjölfar fjárhagslegrar endurskipulagningar. Stærstu eignir þess á síðasta ári voru ráðandi hlutur í Högum, 42,7 prósenta hlutur í Reitum og allt hlutafé í Pennanum.

Eignabjarg seldi þorrann af eign sinni í Högum þegar félagið fór á markað og hefur haldið áfram að minnka þann hlut á þessu ári. Í dag á það 4,99 prósent í Högum. Eignabjarg seldi auk þess allt hlutafé í Pennanum síðastliðið sumar. - þsj