Þýski kappaksturinn í uppnámi

Þýski kappaksturinn í ár mun ekki fara fram á Nürburgring eins og til stóð því samningar hafa ekki náðst milli mótshaldara og Formúlu 1. Bernie Ecclestone, alráður í Formúlu 1, hefur gefið samninga upp á bátinn.

Frá þessu greinir þýska dagblaðiið Der Spiegel í dag en greiðsluvandræði keppnishaldara á Nürburgring hafa verið til umræðu um þó nokkurt skeið.

Þýski kappaksturinn hefur undanfarin ár verið haldin til skiptis á Nürburgring og í Hockenheim. Röðin var komin að Nürburgring því kappaksturinn var haldinn á Hockenheim í fyrra. Óvíst er hvort mótshaldarar í Hockenheim geti tekið við þýska kappakstrinum nú.

Það eru því aðeins átján mót staðfest fyrir keppnisvertíðina í Formúlu 1 árið 2013 en í fyrra voru mótin 20. Mótið á Nürburgring átti að vera nítjánda mótið og í desember boðaði Ecclestone tuttugasta mótið um miðjan júlí.

Útlit fyrir aðeins átján mótEnn er alls óvíst hvort aukamótið fari fram því ekki hefur verið samið við mótshaldara þó nokkrir séu áhugasamir, að sögn Ecclestone. „Ef ég á að vera hreinskilinn þá veit ég ekki hvort aukamótið verði," sagði Ecclestone þegar Autosport spurði um stöðu mála. „Þeir eru áhugasamir í Frakklandi og nú, einnig í Portúgal. Portúgalar vilja halda mótið á nýju brautinni í Algarve."

Áður höfðu brautir í Spielberg í Austurríki og í Istanbúl í Tyrklandi verið til umræðu en möguleikar þessara landa haf horfið á þeim mánuði sem liðinn er síðan Ecclestone boðaði auka mót.

Ecclestone viðurkennir þó að líkurnar á því að tuttugasta mótið verði haldið séu mjög litlar. Bæði hafi samningar ekki náðst og keppnisliðin eru mjög óánægð með þann stutta fyrirvara sem gefinn var. „Ef það vill einhver halda tuttugasta mótið, þá mun það verða ef brautin er til staðar og allt í standi. Við getum svo hjálpað til með skipulagninguna."

„En, liðin virðast ekki vera fylgjandi því að hafa tuttugu mót í ár svo ég efast um að af mótinu verði."