Framkonur örugglega í undanúrslitin

Fram er komið í undanúrslit Símabikars kvenna í handbolta eftir 27 marka sigur á b-liði ÍBV, 42-15, í Vestmannaeyjum í kvöld. Framkonur voru 22-6 yfir í hálfleik og sigurinn því aldrei í hættu. Bæði liðin sátu hjá í fyrstu umferð og voru því að spila sinn fyrsta bikarleik í vetur.

Stella Sigurðardóttir var markahæst hjá Fram með níu mörk en Elísabet Gunnarsdóttir skoraði átta mörk og öll sex mörk Ástu Birnu Gunnarsdóttur komu í fyrri hálfleik.

Margar gamalkunnar handboltakempur léku í liði ÍBV í þessum leik. Ingibjörg Jónsdóttir sýndi að hún hefur engu gleymt en hún skoraði 9 af 15 mörkum Eyjaliðsins í leiknum. Andrea Atladóttir skoraði þrjú mörk.

Tvö önnur félög bætast í hópinn í kvöld en þá mætast FH-ÍBV annarsvegar og Selfoss-Valur hinsvegar.



ÍBV 2 - Fram 15-42 (6-22)

Mörk ÍBV 2: Ingibjörg Jónsdóttir 9, Andrea Atladóttir 3, Aníta Ýr Eyþórsdóttir 2, Íris Sæmundsdóttir 1.

Mörk Fram: Stella Sigurðardóttir 9, Elísabet Gunnarsdóttir 8, Ásta Birna Gunnarsdóttir 6, Birna Berg Haraldsdóttir 5, Sunna Jónsdóttir 4, Hekla Rún Ámundadóttir 3, Guðrún Þóra Hálfdánsdóttir 2, Hafdís Shizuka Iura 2, Steinunn Björnsdóttir 2, Anna María Guðmundsdóttir 1.