Rosberg fljótastur í Mercedes-bíl í Barcelona

Nico Rosberg var örlítið fljótari umhverfis brautina í Barcelona þegar Formúlu 1-liðin hófu aðra æfingalotuna á undirbúningstímabilinu í gær. Hann var 7 þúsundustu úr sekúndu fljótari en Kimi Raikkönen á Lotus.

Æfingarnar í Barcelona munu gefa áhugamönnum og öðrum liðum mun skýrari mynd af því hvar liðin standa fyrir keppnistímabilið sem hefst í mars. Fyrsta lotan var ekin í Jerez en brautin þar fór afar illa með dekkin og gaf skakka mynd af framtíðinni. Auk þess einbeittu liðin sér að áreiðanleika frekar en hraða.

Í Barcelona munu liðin prófa hversu fljótir bílarnir eru og kanna virkni dekkjanna á ystu nöf. Það má því búast við fregnum frá Spáni í vikunni. Æft verður í dag, á morgun og á föstudag áður en Formúla 1 tekur sér annað æfingahlé og fer yfir uppsöfnuð gögn.