Veiðileyfin umsetin hjá SVFS

Fátt er eins mikið í umræðunni meðal veiðimanna en hvernig veiðileyfamarkaðurinn er að þróast, og margir halda að sér höndum við kaup á leyfum fyrir sumarið. Fréttir eru þó misvísandi og vel virðist seljast á á eitt veiðisvæði á meðan sala á önnur er dræm.

Það er því nokkuð fréttnæmt að óvenju mikil eftirspurn var hjá Stangveiðifélagi Selfoss þetta árið eins og kemur fram á vef félagsins. Þar segir frá því að aldrei hafa fleiri umsóknir borist frá félagsmönnum, og átti það við um öll vatnasvæði SVFS. Það seldust til dæmis öll veiðileyfi í Ölfusá frá 24. júní til 4. september og „einnig var alger sprengja í umsóknum um veiðileyfi í Baugstaðaós þar sem draga varð um alla daga frá 25. júní til 25. ágúst," eins og segir í frétt SVFS.

Eins og venja er eftir úthlutun til félagsmanna SVFS fara öll óseld veiðileyfi á veiðisöluvefinn leyfi.is og þar hægt að nálgast veiðileyfi frá SVFS í Baugstaðaósi, Vola,Tungu-Bár, Ölfusá og Hlíðarvatni.

svavar@frettabladid.is