Birgir Leifur hafnaði í fjórða sæti

Aflýsa varð síðasta hringnum á móti í eGolf-mótaröðinni í Suður-Karólínu vegna mikillar rigningar í gær en tveir íslenskir kylfingar tóku þátt í mótinu.

Birgir Leifur Hafþórsson hafnaði í 4.-7. sæti á fimm höggum undir pari eftir að hafa spilað á 70 höggum þriðja keppnisdaginn. Hann fékk að launum 400 þúsund krónur samkvæmt heimasíðu mótsins.

Ólafur Björn Loftsson var í öðru sæti að loknum tveimur hringjum en náði sér ekki á strik á þeim þriðja. Þá lék hann á 76 höggum og endaði hann á samtals þremur höggum undir pari. Hann endaði í 12.-14. sæti og fékk 250 þúsund krónur í sinn hlut.

Sigurvegari mótsins var Bandaríkjamaðurinn Brent Witcher sem lék á samtals ellefu höggum undir pari. Fékk hann 1,9 milljón króna fyrir.