Skyggnst inn í heim fatahönnuða á HönnunarMars

Fatahönnunarfélag Íslands frumsýnir myndbandsverkið Íslenskir fatahönnuðir – Á bak við tjöldin, næstkomandi fimmtudagskvöld klukkan 20.30. Verkið er unnið út frá sýningu félagsins á HönnunarMars í fyrra og veitir okkur djúpa innsýn inn í heim fimm íslenskra fatahönnuða.

Þórey Björk Halldórsdóttir, framleiðandi myndarinnar, segir að það sé spennandi að skyggnast á bak við tjöldin hjá íslenskum fatahönnuðum, þar sé nefnilega ekki allt sem sýnist. „Myndin er unnin út frá verkinu sem Fatahönnunarfélagið var með á HönnunarMars í fyrra sem hét Á bak við tjöldin – frá hugmynd að veruleika. Þar var allt fatahönnunarferlið skoðað frá byrjun til enda, en ýmislegt í ferlinu kemur fólki á óvart, þar sem neytandinn er vanur að sjá bara lokaútgáfuna af flíkinni. Í myndinni fær áhorfandinn góða mynd af fatahönnunarbransanum á Íslandi og hvernig hann gengur fyrir sig, bæði góðu og slæmu hliðarnar."

Þórey segir mikla grósku vera í fatahönnuninni núna. „Það er ákveðinn suðupunktur í fatahönnuninni hér á Íslandi einmitt núna og næstu fimm árin verða mjög spennandi. Á síðustu sex til sjö árum hafa gerst virkilega skemmtilegir hlutir hjá mörgum hönnuðum sem fara ört stækkandi. Fatahönnuðir dagsins í dag eru í raun að skapa tískuheiminn og markaðinn hérna heima. Faggreinin er ung og það verður spennandi að sjá hvað verður", segir Þórey að lokum, en hún ásamt góðu teymi hyggjast fylgja myndinni eftir og halda áfram að fylgjast með íslenskum fatahönnuðum á uppleið næstu mánuði.

Myndin verður frumsýnd á eftri hæð ATMO kl 20.30 á fimmtudagskvöldið og eru allir velkomnir. Hún mun svo rúlla áfram yfir helgina á opnunartíma ATMO.

Meira hér.