Kínverskur 900 hestafla ofurbíll

Finnur Thorlacius skrifar 27. mars 2013 10:45

Örlítið í felum ennþá en verður kynntur í Shanghai bráðlega

Hannaður af Samuel Chaffart sem teiknað hefur Nissan og Jaguar-Land Rover bíla.

Auðvitað vilja Kínverjar líka taka þátt í ofurbílaelítunni ásamt McLaren P1, Ferrari LaFerrari og Lamborghini Veneno sem kynntir voru á bílasýningunni í Genf um daginn. Þeirra framlag, frá framleiðandanum Icona í Shanghai verður kynntur á bílasýningunni í Shanghai í næsta mánuði.

Bíllinn er teiknaður af Samuel Chaffart sem teiknað hefur bíla fyrir Nissan og Jaguar-Land Rover. Hann er með tólf strokka vél og með aðstoð nokkurra rafmótora skilar hann 900 hestöflum til hjólanna. Icona hefur samt ekki kallað hann Hybrid-bíl, en samkvæmt skilgreiningu er hann það samt.

Icona er aðeins tveggja sæta en getur hent þeim tveimur farþegum í 200 kílómetra hraða á innan við 10 sekúndum og hefur hámarkshraða uppá 348 km/klst. Þessi bíll hefur aðeins verið framleiddur í einu eintaki, en aldrei er að vita hvað síðar verður.