Síðan Mercedes Benz hætti framleiðslu á Maybach ofurlúxusbílunum hefur ýmsum fundist skorta bíla frá þeim sem ná hæstu hæðum er kemur að íburði. Ef til vill er það að nást með 2014 árgerðinni af S-Class bíl Mercedes Benz.
Innra útlitið er í ætt við það sem sést í allra flottustu einkaþotum og efnisvalið ekki af slakara taginu, stungið leður, harðviður og mælaborðið virðist stafrænt. Aftursætin má leggja niður ef einhver þarf nú að leggja sig og rétt fyrir svefninn er tilvalið að stilla á heitt nudd sætanna og meira að segja armhvílurnar eru upphitaðar.
Ef of heitt er í lofti má hinsvegar stilla á kælinguna í sætunum. Upplýsingaskjári í mælaborðinu er á við sjónvarp að stærð, 12,3 tommur, eins og í Tesla bílum. Það sem S-Class gerir þó betur er að þeir eru tveir, annar fyrir afþreyingarkerfi bílsins en hinn fyrir aðrar aðgerðir. Verðið á S-Class er á bilinu 23,5 til 27 milljónir króna í Bandaríkjunum, en um helmingi dýrari hérlendis.
Í fyrra seldust 65.158 S-Class bílar um heim allan og búast má við að salan aukist með nýrri gerð. Hann hefur alls selst í um 500.00 eintökum frá því fyrst hann kom á markað árið 2005.
